जुगेडीका स्थानियहरु आन्दोलित, सिडियोलाई ज्ञापनपत्र, माग पुरा नभए चरणबद्ध आन्दोलनको चेतावनी

धादिङ । राजधानी काठमाण्डौलाई जोड्ने पहिलो राजमार्ग त्रिभुवन राजपथको छेउमा रहेको जुगेडीमा सञ्चालित युनाइटेड सिमेन्ट उद्योगबाट निस्कने धुवाँ, धुलोका कारण उद्योगवरपरका स्थानीय मारमा परेको भन्दै बुधबार स्थानियहरुले धादिङका प्रमुख जिल्ला अधिकारी समक्ष ज्ञापन पत्र बुझाएका छन् ।

धादिङको धुनिबेसी नगरपालिका–९ जुगेडीका स्थानियहरुले पटक पटक यूनाइटेड सिमेन्ट उद्योगका सन्चालकहरुलाई परेको समस्या हल गर्न अनुरोध गर्दा नभएको भन्दै चरणबद्ध आन्दोलन गर्ने चेतावनी सहित बुधबार धादिङबेशीमा पत्रकार सम्मेलन गरेका थिए ।

जिल्लाकै पहिलो तरकारी पकेट क्षेत्र रुपमा परिचित जुगेडीमा विद्यमान अवस्था रहिरहे जुगेडी आसपास वा यूनाइटेड सिमेन्ट उद्योगको प्रदुषणले प्रभाव पार्ने क्षेत्रका सवै परिवारको अवस्था कम्जोर बन्दै जाने स्थानियहरुले बताएका छन् । कृषि पेशाले जीविकोर्पाजन राम्रैसंग चलाउदै आएकोमा अहिले लगानी तथा श्रमको मूल्य पनि नआँउने अवस्था र्सिजना भएको र अव ज्याला मजदुरी गर्दै जीविकोर्पाजन चलाउनु पर्ने अवस्था आएको जुगेडीकी रमा राईको भनाई छ । उहाँले सिमेन्ट उद्योगबाट निस्केको धुवाँधुलोको कारण उत्पादनमा कमि आउनुको साथै उत्पादन भएको तरकारी बजारमा विक्री योग्य नभएकोले अझ आर्थिक अवस्था खस्कदै गएको बताउनु भयो ।

जुगेडीका रामकृष्ण राईका अनुसार यूनाइटेड सिमेन्ट उद्योगबाट निस्केको धुवाँधुवाले गर्दा खेतीपातीमा नोक्सानी हुन थालेको, तरकारी तथा फलफूल उत्पादन घटेको, कटहर, आँप, लिचीको बोटमा फल फल्न छाडेको, टनेल भित्र खरिएको तरकारी खेतीमा समेत धुवााधुलोको असर परेको, उत्पादित तरकारी सवै बजारमा विक्री गर्न योग्य नभएका कारण आर्यआर्जजनका ह्रास आएकोले जीविकोपार्जन कठिन बन्दै गएको छ ।

हाल मानव स्वास्थ्यमा प्रतिकुल असरहरु देखा परेकोले घाँटी कसकसाउने, आँखामा पिरो हुने, चिलाउने समस्या समेत देखिएको पत्रकार सम्मेलनमा स्थानियहरुले बताएका थिए । उनिहरुले घरका झ्यालहरु सधै वन्द राख्नु पर्ने अवस्था भएको, कपडा धोएर वाहिर सुकाउन नहुने अवस्था आएको, वस्तुभाउलाई घाँस पखालेर खुवाउनु पर्ने अवस्था आएको समेत स्थानिहरुको भनाई छ । स्थानिहरुले सिमेन्ट उद्योगले वातावरणमा असर नपर्ने गरी सञ्चालन गर्ने बतावरण मिलाइ दिन धादिङका प्रमुख जिल्ला अधिकारी लगाएत सरोकारवाला सवै पक्षसंग आग्रह गरेका छन् ।

यस्ता छन् स्थानियहरुको माग :
> सिमेन्ट उद्योगबाट निस्कने धुवाँधुलो पूर्ण रुपमा बन्द गरिनु पर्ने
> मुख्य राजमार्ग देखि उद्योग सम्म आउने सडक चौडा, पक्की ढलान वा कालो पत्र गर्नु पर्ने
>  कृषि विमा (वाली तथा पशु) गरिदिनु पर्ने र अहिलेसम्मको नोक्सानीको एकमुष्ट क्षतिपूर्ति दिनु पर्ने
>  स्थानीय समूदायका सवै सदस्यको पूर्ण स्वास्थ्य विमा गरिदिनु पर्ने र जुगेडीमा स्वास्थ्य सेवा सञ्चालन गर्नु पर्ने
> स्थानीय महिलाहरुलाई हस्तकला सीप सम्वन्धी तालिम सञ्चालन गरि व्यावसायिक बनाउनु पर्ने
> उद्योग खोल्दा स्थानीयहरुलाई दिएको आश्वासन एक घर एक रोजगार कार्यान्वय गर्नु पर्ने
> वातावरणीय प्रभाव मूल्यांकन प्रतिवेदनको विषयमा नगरपालिका, उद्योग व्यवस्थापन पक्ष र समुदायका प्रतिनिधि छलफल हुनु पर्ने र चौमासिक रुपमा त्रिपक्ष समिक्षा बैठक गरिनु पर्ने
> पोली फर्म उत्पादन गर्दा प्रयोग भएको केमिकलबाट स्थानीयहरु विरामी पर्न थालेकाले स्थानीयलाई असर नपर्ने गरी उद्योग सञ्चालन गर्ने बतावरण मिलाउनु पर्ने