पर्सिसम्म नै मौसम धुम्मिने,हल्का वर्षा र हिमपातको सम्भावना

काठमाण्डौ,०७ माघ।
आज पनि मौसम आंशिकदेखि सामान्य बद्ली हुनेछ ।

आज पहाडी क्षेत्रका धेरै ठाउँमा सिमसिम पानी पर्ने मौसमविद् शान्ति कँडेलले बताउनुभयो। दिउँसो केहीबेर घाम देखिए पनि फेरि बादल लाग्ने उहाँले बताउनुभयो।अहिले प्रदेश–१ र वाग्मती प्रदेशका केही ठाउँमा हल्का पानी परिरहेको छ भने उच्च पहाडी र हिमाली जिल्लामा हिमपात भइरहेको छ ।

यस्तै, राति पनि देशका एक/दुई ठाउँमा हल्का पानी पर्ने छ भने उच्च पहाडी तथा हिमाली जिल्लामा हिमपात हुने सम्भावना छ । पश्चिमी वायुको प्रभावका कारण भोलि र पर्सि पनि मौसम यस्तै रहने मौसमविद्ले बताएका छन् ।

हल्का वर्षा र बादलका कारण देशभरको अधिकतम तापक्रम घटेको छ । अधिकतम तापक्रम अझै घट्ने मौसमविद् शान्ति कँडेलले बताउनुभयो । मौसम बद्ली भइरहेकाले न्यूनतम तापक्रम भने घटेको छैन । तर अधिकतम तापक्रम घट्दा पनि चिसो बढ्छ ।