घरगोठ र फलफूलको मुआब्जा माग गर्दै बूढीगण्डकी प्रभावित आन्दोलित

पत्रपत्रिका समाचार

Home
घरगोठ र फलफूलको मुआब्जा माग गर्दै बूढीगण्डकी प्रभावित आन्दोलित

माग पुरा नभए थप आन्दोलन गर्ने चेतावनी

बिहिबार, मंसिर १८, २०७७ Dhading Sanchar

धादिङ,१८ मंसिर ।
धादिङ र गोरखाको सिमाना भएर बग्ने बुढीगण्डकी नदीको पानीबाट निर्माण गर्न लागिएको बूढीगण्डकी जलविद्युत आयोजना डुबान प्रभावित क्षेत्रका नागरिक आन्दोलित भएका छन् । जलविद्युत निर्माणका लागि तत्काल मोडालिटी टुङ्ग्याउन तथा प्रभावित क्षेत्रभित्रको घरगोठ र फलफूलको मुआब्जा वितरण तत्काल गर्न भन्दै उनीहरुले आन्दोलन सुरु गरेका हुन् ।

आन्दोलनको पहिलो चरण अन्तरगत बूढीगण्डकी जलविद्युत आयोजना राष्ट्रिय सरोकार समितिको अगुवाइमा धादिङको सिद्धलेक गाउँपालिका सलाङ र गोरखाको गण्डकी गाउँपालिका घ्याल्चोकका स्थानीयले गोरखाको गण्डकी गाउँपालिका–८ सिउरेनटारस्थित बूढीगण्डकी जलविद्युत् आयोजनाको वातावरण, मुआब्जा, पुनर्वास तथा पुनःस्थापना इकाईमा प्रभावितले धर्ना सुरु गरेका छन् । बुधबार देखि सुरु भएको धर्ना कार्यक्रम आगामी मंसिर २४ गते सम्म चल्ने डुबान प्रभावित एक बहादुर मगरले बताउनु भयो । हाल कोभिड–१९ को संक्रमणलाई मध्यनजर गर्दै बढीमा २५ जना मात्र धर्नामा बसेको मगरको भनाइ छ । धर्नामा धादिङ र गोरखा दुवै जिल्लाका डुबान प्रभावित क्षेत्रका स्थानीय पालैपालो सहभागी हुने सरोकार समितिले बताएको छ ।

जलविद्युत आयोजनाको मोडालिटी टुङ्ग्याएर निर्माण कार्य तत्काल सुरु गर्न, प्रभावित क्षेत्र भित्र पर्ने घरगोठ तथा बोटबिरुवाको लगत सार्वजनिक गर्न, दररेट निर्धारण गरी मुआब्जा वितरण गर्नुपर्ने आन्दोलित स्थानीयको माग छ । माग पुरा गराउनका लागि पहिलोचरणमा धर्ना कार्यक्रम गरिएको र आफ्ना माग पुरा नभए थप आन्दोलनका कार्यक्रमहरु गरिने सरोकार समितिका संयोजक हरेराम ढकालको भनाइ छ ।

‘फिल्डबुकमा जग्गा भएको तर लालपूर्जामा नभएको जग्गा, सिमानामा परेका जग्गा, कित्ता नम्बर फरक परेका जग्गा, लालपूर्जा खेत भए पनि पाखोको मुआब्जा पाएको जग्गाको गुनासो तत्काल सम्बोधन हुनुपर्छ,’ सरोकार समितिका संयोजक ढकाल भन्नुहन्छ, ‘दर्ता छुट भएका जग्गाको मुआब्जा वितरण तथा पुनर्वास पुनःस्थापनाको ग्यारेन्टी गरिनुपर्छ ।’

१२ सय मेगावाट विद्युत उत्पादन गर्ने जलासयमा आधारित यो आयोजनाबाट धादिङका सलाङ, चैनपुर, मैदी, खरी, मारपाक, ज्यामरुङ, त्रिपुरा, आगिञ्चोक तथा गोरखाका घ्याल्चोक, बुङकोट, दरबुङ, भुम्लीङचोक, नामजुङ, फुजेल, बोरलाङ, तान्द्राङ, धावा, आरुचनौटे, आरु आर्बाङ, थुमी, लगायतका स्थान प्रभावित हुनेछन् । यी क्षेत्रबाट ४८ हजार रोपनी जमिन अधिग्रहण गर्ने र जहाँबाट ४५ हजार जना विस्थापित हुनेछन् ।

जलविद्युत आयोजना निर्माण पश्चात ती स्थानमा पोखराको फेवाताल भन्दा करिब १४ गुणा ठूलो ताल बन्ने र तालको वरिपरि चक्रपथ निर्माण गरेर पर्यटन प्रवद्र्धन गर्ने लक्ष्यसमेत राखिएको थियो । धादिङ तर्फ ३५ हजार रोपनी र गोरखातर्फ करिब ३२ रोपनी क्षेत्रफल डुबान पर्ने आयोजनाको डिपिआरमा उल्लेख छ ।

प्रकाशित मिति: बिहिबार, मंसिर १८, २०७७

आफ्नो टिप्पणी दिनुहोस्